Полициски службеници од Отсекот за превенција при СВР Велес, денеска (08.12.) на повеќе локации на подрачјето на Одделението за внатрешни работи Кавадарци спроведоа превентивна активност во рамки на кампањата – „Заштита на шумите од кражби на дрва“.

Во непосреден контакт и разговор со граѓаните на повеќе места во тиквешијата им беше укажано дека шумите се наше богатство кое сме должни да го чуваме , а секое незаконско сечење на дрва претставува кривично дело кое се санкционира.

Во рамки на разговорите беше апелирано до граѓаните за потребата од внимателност и совесност, но и за потребата од навремена соработка и комуникација со надлежните служби, вклучително и полицијата во интерес на превенција од последиците од бесправното сечење на шумите.

Целта на проектот беше да се информираат локалните жители за овој вид на криминалитет и да се подигне свеста на граѓани во насока на поголема одговорност и соработка со надлежните институции во откривањето и спречувањето на бесправната сеча на шуми, за што на граѓаните им беа поделени и едукативни печатени материјали со информативни содржини изработени во соработка со „Национални шуми“ и Шумска полиција.