Вчера (29.11.) на улицата „Миро Барага“ кај градскиот пазар во Пробиштип, полициски службеници од ОВР Пробиштип, реализираа превентивна активност во рамки на проектот „МВР за граѓаните“ и „Сигурноста и безбедноста на граѓаните - наша обврска“. Притоа на граѓаните и сопствениците на деловни објекти им беше укажано на мерките за заштита и самозаштита од разбојништва, кражби, џепни и дрски кражби.
Целта на активноста, покрај едукативно - информативниот карактер, е заштита и спречување, односно намалување на бројот на кривични дела од областа на имотните деликти. Исто така реализирана е превентивна активност под мотото – „Обезбеди го твојот дом“ при што беше потенцирана неопходноста од соработка и навремена комуникација на граѓаните со полицијата и пријавување на овој вид настани на бесплатните телефонските броеви 112 и 192, а на граѓаните им беа поделени печатени едукативни материјали.

Покрај ова, полициски службеници при ОВР Свети Николе реализираа превентивна активност под мотото ,,Биди одговорен возач – користи зимска опрема “. Превентивната активност беше реализирана на неколку патни правци во и околу Свети Николе, при што полициските службеници преку непосреден контакт со учесниците во сообраќајот укажуваа на обврската за носење на зимска опрема која е задолжителна во периодот од 15 ноември до 15 март за да можат и во зимски услови да се движат непречено и безбедно во сообраќајот, а беше укажано и на казнените одредби кои следуваат за непочитување на оваа законска одредба. Полициските службеници делеа и едукативен печатен материјал изработен во соработка со Републичкиот совет за безбедност на сообраќајот на патиштата, а се со цел зголемување на свеста кај учесниците во сообраќајот како и подобрување на личната но и безбедноста на сите учесници во сообраќајот.