Полициски службеници од Полициската станица за граничен надзор Попова Шапка заедно со полициски службеници од Регионалниот центар за гранични работи Север вчера (31.01.2023) на повеќе локации на регионалниот пат Тетово – Попова Шапка реализираа превентивна активност посветена на превенцијата за заштита на здравјето во екстремни зимски услови.
Во рамки на превентивните активности во кои што беа вклучени жители од населените места – Шипковица, Бродец, Вешала и Бозовце, полициските службеници укажаа на потребата од внимателност при движење во екстремни временски услови во зимскиот период, особено околу опасностите од појави на смрзнатини и други повреди. Покрај ова, на месното население и другите учесници во сообраќајот на овој патен правец им беа поделени печатени летоци со информативни содржини за превенција и самозаштита од смрзнатини.
Исто така вчеравечер, полициски службеници од Регионалниот центар за гранични работи Север, заедно со полициски службеници од Полициската станица за Граничен премин и граничен надзор Крива Паланка реализираа превентивни активности околу спречување на криволовот, а во пресрет на отпочнувањето на сезоната на ловостој, која што практично почнува од денес. Во теренските активности во кои што учествуваа и претставници на ловни друштва од селата Ранковце и од реоните на селата Герман и Пклиште, полициските службеници укажуваа на законските одредби, но и на законски предвидените санкции согласно Законот за лов и риболов, како и за почитување на нормативните прописи согласно законите за гранична контрола, за ловство, за полиција, Кривичниот законик, кои што, исто така, ја третираат проблематиката на криволовот.