Продолжувајќи со превентивниот проект “Безбедност во училиштата“, денеска (7.12) полициски службеници од Одделението за превенција при СВР Скопје заедно со полициски службеници од Полициските одделенија Петровец и Сарај реализираа две едукативни работилници со децата во основните општински училишта “Братство- Единство“ (село Средно Коњари) и “Ибе Паликуќа“ (село Бојане).

Овој пат, темите на работилниците, покрај проблематиката на насилствата, се однесуваа на корпусот човекови права, со посебен акцент на правата на децата и нивна заштита. Од страна на полициските службеници децата беа запознати со основните и темелни принципи на човековите права, како и со правата на децата, што претставуваат тие, за Конвенцијата за правата на децата на ОН, за заштитата на детските права и кои институции се грижат за заштита на правата на децата.

Основна цел на презентациите беше запознавање и мотивирање на учениците за нивен активен ангажман преку Клубовите на превенција во промовирањето на нивните права и одговорности, а пред се во насока на нивна заштита од опасностите на разните социо-патолошки појави.